للأسف شباب وبنات كتير مايعرفوش إن في ضوابط للخطوبة
و بيحصل تجاوزات كتير (أغلب الاحيان) في فترة الخطوبة
عشان كده طلع مصطلح في مجتمعنا (البنت دي مفسوخ خطوبتها) يعني إتمسك إيديها و ركبت معاه العربية و أكتر من كده ومخهم بيرو...ح لبعيد.
عشان كده ربنا وضع في ضوابط شرعية لفترة الخطوبة ...
عشان لو محصلش نصيب وإتفسخت الخطوبة يبقي عادي مافيش مشكلة ,العلاقة بينهم كانت في إطار محدد كل الناس عارفاه.
قبل ما نتكلم في الضوابط ...ليه فترة الخطوبة ؟؟؟
بإختصار
عشان في الفترة دي (مثلا لو كانت سنة) أحكم علي الطرف التاني هو ينفع أعيش معاه ال 50سنة الجاية في حياتي
كازوج وأب لأولادي ؟واتأكد ان إختياري كان صح ... ونتفق علي المباديء والقيم اللي هانبني عليها بيت لا يمكن هدمه وازاي هانتعامل مع الخناقات وغيره ...وأعرف عيوبه ومميزاته وهاقدر أتعامل معاها ولا لأ.
ندخل علي الضوابط...بعد ما عملتي الاستخارة و حصل قبول للطرف الاخر وإتخطبتوا ...في ضوابط ربنا حطها لينا عشان نمشي عليها في الفترة دي
(سبحان الله ,ربنا حط لينا قواعد لكل حاجة في حياتنا عشان مش نتوه في الدنيا الكبيرة دي ونتلخبط )
عايز تعيش وماتندمش ... علي السنة و القرأن امشي ... عينيك تشوف الصورة أوضح
والضوابط دي محدش هاينفذها كلها إلا الناس المستسلمين لربنا
و حـــــــــــب ربنا مــــــــــــــــــــــالي
د.عمرو خالد ... الشيخ محمد حسان ... ا/مصطفي حسني ... الشيخ محمد حسن يعقوب ... الشيخ أبو إسحاق الحوينى... ا/معز مسعود ...
كل الشيوخ والدعاة بإختلاف مذاهبهم اتفقوا علي ... أ ب ضوابط في فترة الخطوبة
الضوابط في فترة الخطوة:
1-لا لمس
2-لا خلوة
3-ستر للعورات ولا نظر الي ما حرم الله "عز وجل"
هاشرحلكم بالمواقف اللي بتحصل الايام دي رغم إنها حرام
(1)لا لمــــــــــس
قال رسول الله صلى الله عليه وسلم قال: "لأن يطعن في رأس أحدكم بمخيط من حديد خير له من أن يمس امرأة لا تحل له" رواه الطبراني والبيهقي
1-يوم حفلة الخطوبة ماينفعش الولد يمسك إيد البنت يلبسها الدبلة والشبكة ... ممكن حاجة لطيفة إن مامته أو مامتها هما اللي يلبسوهم الدبل و الشبكة .
2-صور الخطوبة ماينفعش تمسكوا إيد بعض و تحضنوا بعض والكلام ده ...حرااااااااام جداااا , إبتكروا صور جديدة مايكنش فيها أي وضع فيه لمس
3-ماينفعش يرقصوا (slow) ويمسك وسطها أو كتفها .
4-ماينفعش أي موقف تاني ممكن يحصل فيه لمس حرام.
(2) لا خلوة
قال صلى الله عليه وسلم: لا يخلون رجل بامرأة ولا تسافر امرأة إلا ومعها ذو محرم. رواه الإمام أحمد
1- ماينفعش يقعدوا مع بعض لوحدهم .
2-ماينفعش يخرجوا مع بعض لوحدهم ويوصلها البيت و يروحوا مع بعض مشاوير .
3-ماينفعش البنت تركب مع خطيبها العربية أبدا , لما بتركبي تاكسي بتقعدي ورا , اما خطيبك هاتقعدي جنبه وفي شهوة بتكون موجودة .
*طبعا لازم الولد والبنت المخطوبين يقعدوا مع بعض ويعرفوا بعض في وجود محرم ومش لازم المحرم يسمع كلامهم كله بس المهم يكون موجود في المكان
وممكن تسافروا مع بعض في وجود محارم مع أهلك وأهلها مع الحفاظ علي الضوابط الشرعية
(3) لا نظر الي ما حرم الله و ستر للعورات
ماينفعش (لا يجوز) كلام رومانسي زيادة عن اللزوم في فترة الخطوبة
..لانها هاتحجب العيوب في الطرف الأخر ومش هاتخليكي تفكري بعقل
المفروض إن فترة الخطوبة فترة حب متغلفة بعقل
يعني عبروا عن حبكم بأفعال ومواقف من غير كلام رومانسي زيادة عن اللزوم االلي ساعات بيوصل لكلام مايصحش أبدا و شهوة بتؤدي اللي زنا السمع
ليه ناس كتير مش بتطبق ضوابط الخطوة؟
ممكن
1-الولد بيكون أناني أحيان كتير و جريء ومندفع
حتي لو ملتزم بس البنت ماعملتش ليها إطار محدد معاه و سمحت ليه يتجاوز الحدود , هايتجاوزه , لإن الشهوة كتير بتكون أكبر منه.
2-البنت بتخاف الولد يسيبها ويقول عليها معقدة ,لو قالته ماينفعش أركب معاك العربية و تمسك إيدي وغيره...
3-كتير من الشباب مايعرفوش إن في ضوابط شرعية لفترة الخطوبة عشان كده لازم ننشر الموضوع و نرجع الاسلام تاني بيوتنا بقوة بجد.
لو ربنا قالك ده غلط قالها علشان مصلحتك
شعار شباب كتير:
متدينة أه ... معايا لأ
ماينفعش تستجيبي للولد حتي لو بتحبيه لما يقولك إنك كده مش يتحبيني لما ترفضي تخرجي معايا لوحدك
أو يقولك أنا هاكون جوزك يعني مافيش مشكلة لو عملتي كذا وكذا...
طالما لسه مش كتبتوا الكتاب هو لسه أجنبي عنك يعني مافيش بينك وبينه إلا وعد بالجواز فقط لا غير يعني مش هاتتجوزي حد غيره وماينفعش حد يخطبك
يلا يا بنات النبي ... المخطوين و اللي لسه هايتخطبوا
قولي : أنا مش هاغضب ربنا عشان حد وهاطبق ضوابط فترة الخطوبة
عايزين نبني بيت لا يمكن هدمه ويكون بركة ربنا معانا
يلا نقول وعجلت اليك ربي لترضي ...هاطيع ربنا و هانفذ أوامره اللي بيحبها وبس
مقال لعلي مجدي
0 التعليقات على "ضوابط الخطوبة من وجهة نظر شاب ملتزم"
إرسال تعليق